27. okt. 2014

Minningartónleikar um Sigurð Heiðar Jónsson, haldnir í Hofi 25. október 2014

Myndirnar tók Daníel Starrason. Takk.
















Þorgils Gíslason sýnir 1.-2. nóvember







Stratospehere – Þorgils Gíslason

Laugardaginn 1. nóvember kl 14.00 opnar Þorgils Gíslason tónlistarmaður sýninguna Stratosphere í Populus tremula. 

Á sýninguni verða video og grafíkverk unnin út frá The Berlin School tónlistarstefnunni sem varð til fyrri hluta 8. áratugsins.

Sýningin er einnig opin sunnudaginn 2. nóvember kl 14.00-17.00. 
Aðeins þessi eina helgi.

15. okt. 2014

Litla ljóðahátíðin


Litla ljóðahátíðin í Norðausturríki 2014 stendur dagana 16.-19. október.

Í Populus tremula verður ljóðadagskrá klukkan fimm laugardaginn 18. okt. þar sem eftirtalin skáld lesa úr ljóðum sínum: 
Bjarki Karlsson, Kristín Eiríksdóttir, Kristian Guttesen, Gréta Kristín Ómarsdóttir og Jón Laxdal munu lesa úr verkum sínum. Þetta verður að líkindum í síðasta sinn sem Litla ljóðahátíðin verður haldin í Populus.

Sunnudaginn 19. október verður svo ljóðaganga í Vaðlaskógi, gegnt Akureyri, og hefst klukkan 14.00 á bílastæðinu rétt austan Leiruvegar. Ljóðadagskrá og kynning á skóginum undir handleiðslu Skógræktarfélags Eyfirðinga, sem býður upp á ketilkaffi og meðlæti. Fram koma Bjarki Karlsson, Kristín Eiríksdóttir, Kristian Guttesen og fleiri.

14. okt. 2014

Populus 10 ára – minningartónleikar um Sigurð Heiðar Jónsson haldnir í Hofi 25. október


Laugardaginn 25. október 2014 verða haldnir tónleikar í menningarhúsinu Hofi á Akureyri á vegum Populus tremula sem starfað hefur í tíu ár samfleytt og sett svip sinn á menningarlífið með afgerandi hætti. Tónleikarnir eru haldnir til minningar um aðalhvatamann og leiðtoga Populus tremula, Sigurð Heiðar Jónsson.

Á tónleikunum í Hofi mun Populus-hljómsveitin einskorða sig við lög eftir þrjá óumdeilda snillinga sem hún hefur sérhæft sig í: Tom Waits, Nick Cave og Cornelis Vreeswijk. Auk fastra meðlima hljómsveitarinnar munu koma fram tveir víðkunnir gestasöngvarar – þau Sigríður Thorlacius og Valdimar Guðmundsson.
Hljómsveitin sjálf – Húsband Populus tremula – er svo skipuð:
Kristján Pétur Sigurðsson, söngur; Arna Valsdóttir, söngur; Arnar Tryggason, hljómborð og harmónika; Bárður Sigurðsson, gítar og banjó; Guðmundur Egill Erlendsson, gítar; Hjálmar Stefán Brynjólfsson, bassi o.fl.; Orri Einarsson, trommur; Fleiri munu stíga á svið.

Hljómsveitin hefur í áranna rás haldið fjölmarga tónleika og víða við góðan orðstír og fögnuð og fengist við verk fleiri höfunda en hér hafa verið nefndir. Má þar nefna Megas og Leonard Cohen.

Menningarsmiðjan Populus tremula var stofnuð haustið 2004 og fékk þá til umráða húsnæði í kjallara Listasafnsins á Akureyri og hefur haft þar aðsetur síðan. Þótt tónlist hafi verið límið í starfseminni var frá upphafi mörkuð sú stefna að halda úti alhliða menningarsmiðju, enda plássið kjörið til hvers konar listviðburða. Nú, að tíu árum liðnum frá stofnun, hafa verið haldnir rétt um 300 list- og menningarviðburðir í kjallaranum góða og þar er af mörgu að taka:
Myndlist, tónleikar af ýmsum toga, bókmenntaviðburðir fjölmargir, leiksýningar og eiginlega allt sem nöfnum tjáir að nefna á sviði lista.
Aldrei hefur í allan þennan tíma verið tekið gjald af neinum; þ.e.a.s.: ókeypis hefur verið inn á alla viðburði frá upphafi og listafólk hefur aldrei þurft að greiða fyrir að fá að koma þar fram. Fjöldinn allur af víðkunnu og virtu listafólki hefur komið þar fram með einum eða öðrum hætti og jafnframt hafa fjölmargir ungir listamenn á öllum aldri stigið þar sín fyrstu skref. Populus tremula hefur gefið út rúmlega 20 bækur af ýmsum toga, bæði eftir þekkta listamenn og nýliða. Allir hafa átt jöfn tækifæri í Populus þennan áratug. Einnig var gefin út hljómplata með „húsbandinu“.

Frá upphafi hafa félagsmenn borið jafna ábyrgð á starfseminni og kostuðu hana fyrstu árin úr eigin vasa. En án traustra bakhjarla hefði þetta aldrei verið hægt. Því ber sérstaklega að þakka Ásprenti Stíl, Menningarráði Eyþings og Akureyrarstofu fyrir veittan stuðning. Fjölmargir aðrir hafa lagt starfinu lið með einum eða öðrum hætti.
Í árslok 2014 verður starfsemi Populus tremula hætt og félagið lagt niður, enda komið að kynslóðaskiptum á þessum vettvangi.

Sigurður Heiðar Jónsson, sem tónleikarnir eru haldnir til minningar um, var einlægur unnandi fagurra lista og húmanisti fram í fingurgóma. Uppruna hljómsveitarinnar má rekja til þess að hann safnaði saman góðu fólki til að búa til tónlistardagskrá með lögum Cornelis Vreeswijk árið 2002. Og lét ekki þar staðar numið heldur varð hvatamaður að stofnun og leiðtogi Populus tremula, allt frá fyrstu hugmynd og uns hann varð að láta undan fyrir MND-sjúkdómnum snemmsumars 2011, langt fyrir aldur fram. Sigurður Heiðar lifði og dó með reisn. Þannig vilja aðstandendur að Populus tremula sé einnig minnst. Lifi minning Papa Populus!


Miðasala á: www.menningarhus.is

13. okt. 2014

Birgir Sigurðsson sýnir 25.-26. október





Laugardaginn 25. október 2014 kl. 14.00 opnar Birgir Sigurðsson myndlistarmaður sýninguna Í túninu heima – seinni hluti í Populus tremula. 

Á sýningunni verða video, ljós og teikningar. Birgir, sem margoft hefur sýnt í Populus tremula áður, er ekki einungis kunnur fyrir einkar áhugaverð ljósverk og ýmsa listviðburði, heldur hefur hann undanfarið ár rekið hið merkilega listhús Gallerý 002 í íbúð sinni í Hafnarfirði.

Sýningin er einnig opin sunnudaginn 26. október kl. 14.00-17.00. Aðeins þessi eina helgi.

Ljóðagangan 2014



Sunnudaginn 19. október verður hin árlega LJÓÐAGANGA farin í VAÐLASKÓGI í Eyjafirði. 

Metnaðarfull ljóðadagskrá, ketilkaffi og meðlæti að hætti skógarmanna. Ljóðagangan er hluti af LITLU LJÓÐAHÁTÍÐINNI sem haldin er þessa helgi á Fljótsdalshéraði og í Eyjafirði.

Ljóðskáldin þetta árið eru: Bjarki Karlsson, Kristín Eiríksdóttir, Kristian Guttesen og fleiri. Allir velkomnir.

GANGAN HEFST Á BÍLASTÆÐINU VIÐ VAÐLASKÓG, rétt austan við brúna á Leiruvegi, KLUKKAN 14:00.

5. okt. 2014

Emma Agneta sýnir 11.-12. október






Laugardaginn 11. október 2014 kl. 14.00 opnar Emma Agneta myndlistarsýninguna Inni í myndinni í Populus tremula. 

Í verkunum á sýningunni fjallar listakonan um áþreifanleika og hugmyndir sem birtast inn í myndum. Tilfinngar ásamt litagleði sem stíga dans í oróa eða kyrrð. 

Sýningin er einnig opin sunnudaginn 12. október kl. 14.00-17.00. 
Aðeins þessi eina helgi.